US-in Afghanistan aṭang sipai 4000 lakchhuak dawn

United States (US) chuan Afgha­nistan-a awm mek an ram sipai 4000 zet chu a lachhuak dawn niin an ram media-te chuan an tarlang.

Vawi tam tak US leh Afghanistan-a Taliban firfiakte hian inremna zawnga inbiakna neih an tum fo a, ṭum eng emaw zat ṭhulh a ni tawh bawk. Kar kal ta khan US leh Taliban-te hian inkahhai puangin, inremna zawnga inbiakna an neih thu tarlan a ni a, nimin khan sipai lakchhuah an nih dawn thu hi tarlan a ni leh ta bawk a ni.

Kawng hrang hrangin inbiakna neih hi tum ṭhin mah se an hlawhtling hlei thei lo a, kar hmasa erawh kha chuan inbiakna hi an nei thei ta niin a lang. Thla hmasa khan US president Do­nald Trump chuan puangzar lawk loin Afgha­nistan-a US sipaite hi tlawhin a zin a ni.

Trump hian an ram sipaite dinhmun hrechiang turin leh, lakchhuah dan tur chungchang enfiahin Afghanistan hi a tlawh nia tarlan a ni. Afganistan-a a cham chung hian Afghanistan president Ashraf Ghani nen inbiakna an nei a, ram pahnihte kawng hrang hranga an thawhdunna tur chungchang an sawi.

Kum 2001-a US-in al-Qaida firfiakte laka beihpui a thlak aṭang khan Afgha­nistan-ah hian US hian a sipai eng emaw zat chu a dah reng a, tunah hian US sipai 13,000 vel leh NATO sipai sang chuang an la awm mek a ni.