Lawng 90-in Strait of Hormuz paltlang tawh

US leh Israel-in Iran-a beihpui an thlak hnua Iran-in oil phur chhuahna tui kawng pawimawh, Strait of Hormuz a khar hnuah he tui kawng hi lawng 90 velin a kaltlang tawh a, an zingah hian oil tanker eng emaw zat an tel. Hetih lai hian Iran hian lawng tam zawk chu a dang zel tho a ni.

Maritime leh trade data platform-ten an tarlan danin, Iran war a chhuah hnuah Hormuz Strait paltlang lawngte hi Iran nena inzawmna nei nia sawi an ni. Tun hnaiah Iran hian Pakistan leh India lawng a kaltlangtir bawk. Indona thlen hma khan Hormuz Strait hi nitin lawng lian 100 - 135 velin an paltlang ṭhin. Mahse, indona thlen hnuah lawng veivak 95% chuang chu Iran hian a dang a ni. Iran foreign affairs minister Abbas Araghchi chuan Strait chu an hawng reng a, mahse an hmelmate tan erawh khar a ni tih Thawhṭanni khan a sawi.

Iran-in Strait of Hormuz a khar avang hian Middle East ramte chuan an oil-te an thawn chhuak thei lo a, hetihlai hian Iran chuan a oil-te chu a la thawn chhuak reng thung. Tun thla chhungin oil hi barrel mtd 16 chuang a thawn chhuak tawh a, a tam zawk hi China-in a lei nia tarlan a ni bawk.