Qatar leh Iran energy facility beih hnuah gas man a sang

Israel-in Iran rama South Pars gasfield a beih hnuah, Iran chuan a ṭhenawm Gulf rama energy site a bei ve leh nghal a, Qatar-a gas facility lian ber, Ras Laffan chu missile-in a kap. Energy facility-te beih an nih vang hian UK leh Europe-ah gas man a sang zui nghal bawk. Gas man hi wholesale in 25% chuangin a sang hman a, mahse, a hnuah a tlahniam leh ta deuh mah se indona thlen hma aiin a man hi a letin a la sang tho a ni.

Iran-in a beih chhunzawm zel avangin Gulf ram dangte nena inkar pawh a chhe sawt hle a, Saudi Arabia chuan Iran laka rinna chhete an la nghah chu anmahni bawk chuan an tichhia niin a sawi. Qatar pawhin an gas facility beih a nih hnuah an rama Iran security mi leh sa awmte chu chhuak turin thupek a tichhuak nghal bawk.

Khawvela liquefied natural gas (LNG) mamawh zinga 20% hi Qatar aṭanga thawn chhuah niin, hei hi iran nena gasfield in ṭawm an neih aṭanga an siam chhuah a ni. US dawta LNG siam chhuaktu ram lian pahnihna a ni. Iran-in Ras Laffan gas facility a beih hian khawvel economy thlengin a nghawng nat hle rin a ni bawk.

Israel-in Iran-a South Pars gasfield a beih hi khawvela natural gas field lian ber zingah a tel a, he hmunah hian Qatar leh Iran chuan hmun an nei ve ve a ni. US president Donald Trump chuan South Pars beih a nih dan hi engmah hriat a nei ve lo niin a sawi a, hetih lai hian Ras Laffan beih a nih chungchangah Iran chu na takin a vau thung. Qatar a bei chhunzawm leh a nih chuan Iran chu na taka an chhan let tur thuin a vau a ni. Iran hian Kuwait-a oil refinery pawh drone hmanga beiin, a kang zui a, mahse rei vak lo hnuah kangmei chu an thunun thei tih Kuwait Petroleum Corporation chuan a tarlang.