Sudan hospital beihnaah mi 64 an thi

World Health Organisatin (WHO) chuan Sudan-a Darfur biala hospital chu beih a ni a, mi 64 thiin an zingah naupang 14 an tel tih a sawi.

WHO hotu, Tedros Adhanom Ghebreyesus chuan kar liam ta Zirtawpni zan rei lamah East Darfur state khawpui, al-Daein a al-Daein Teaching Hospital beih a nih thu sawiin, mi 64 an thih bakah hliam 89 an awm tih a tarlang. Thi zinga a tam ber hi damlo enkawl lai niin, nurse pahnih leh doctor pakhat an thi tel bawk a ni. Pawikhawihtute hian hospital-a paediatric, maternity leh emergency department hmun te an bei a ni. He thil thleng vang hian khawpui chhunga medical service pawh a bahhlah phah hle.

Tedros chuan Sudan army leh paramilitary Rapid Support Forces (RSF) te kum thum dawn an inbeih tawhnaah health facility-te pawh an him lo a, hmun 2,000 chuang beih a ni tel tawh a ni, a ti. Sudan army leh RRSF hi kum 2023, April thla laihawl aṭang khan thuneihna inchuhin an inbei ṭan a, tun thlengin an la buai reng a ni. RSF hian Sudan khawthlang lam, Darfur bial leh a chhehvel an thunun a, Army lam hian khawchhak, an ram laili lai leh hmar lamte an thunun thung.

Sudanese right group, Emergency Lawyer chuan al-Daein Teaching Hospital hi Sudan army drone hmanga beih niin an tarlang.