Hong Kong police-ten phone leh computer password dil thei

Hong Kong sorkar chuan an police-te chu national security law bawhchhiaa puhte chu an mobile phone leh computer password hrilh tura phut theihna thuneihna a pe.

Nimina sorkar thuchhuah chuan he dan thar hi Thawhṭanni aṭang khan hman nghal a nih thu a tarlang a, nimin khan lawmaker-te pawh thil awmdan hrilhfiah an ni. Kum 2020-a Hong Kong-a democracy thlawpna leh, China sorkar thu a neihna duh lohna lantira nawrh lian tham tak huaihawt a nih hnuah, national security law hi siamin hman a ni.

City government-in national security law a siamṭhatah hian, police-te ram himna tiderthawng thei nia an ngaihte an chhui chianna atana an phone leh computer password an dil pe duh lote chu kum khat lung-in tan bakah Hong Kong dollar 100,000 chawi tir theih an ni dawn a, hei bakah thu dik lo hrilhte chu kum thum tantir bakah Hong Kong dollar 500,000 thleng chawi tir theih an ni bawk ang.

National security law siamṭhatah hian custom officer-te thuneihna pawh pek belh an ni a, ram himna tiderthawng thei hmanrua nia an ngaihte chu an man thei vek dawn a ni. Law enforcement officer-te thuneihna sang zawk pek hi sawiseltu pawh tam tak an awm a, mimal tinten inbiakpawhna lama privacy a neihte a bawhchhia niin an sawi. Mahse, sorkar thupuangtu chuan dan siamṭhat hian mipui nawlpui nunphung, institution leh organisation-te a nghawng buai dawn lo tih a sawi thung.

Hong Kong-a national security law hman a nih hnuah mi 386 chu dan bawhchhiaa puhin man an ni tawh a, an zinga mi 176 leh company pali chu thiam loh chantir an ni tawh bawk.