Colombia-a sipai thlawhtheihna tlaah mi 66 an thi

Colombia-a Puerto Leguizamo-ah an ram huna Thawhṭanni khan sipai thlawhtheihna, mi 128 chuanna chu a thlawh chhuah hnu rei lo teah a tla a, mi 66 an thi.

Colombia armed force hotu, general Hugo Alejandro Lopez Barreto chuan thlawhtheihnaa chuang tam ber chu sipai an ni tih a sawi a, hliam tuar eng emaw zat awmin, chin hriat lohin mi pali an awm bawk tih a sawi. Thlawhtheihna chetsual chhan hi hriat chian a la ni lo a, chhui mek a ni, a ti bawk.

Puerto Leguizamo hi an ram chhim lam, Ecuador leh Peru ramri bul Putumayo province-a awm a ni. Thlawhtheihna chesual hi province chhung khawpui danga kal tur a ni a, Lockheed Martin siam four-engine turboprop, Herculs C-130 niin US in kum 2020-a Colombia a pek a ni. Defence minister Pedro Sanchez chuan chetsualna thleng chu pawi a ti takzet tih sawiin, thlawhtheihna tlak chhan tak chu hriat a la ni lo tih a sawi. Thlawhtheihna hi Puerto Leguizamo aṭanga ramri bul outpost lam pan tur a ni tih general Carlos Fernando Silva Rueda chuan a sawi bawk.

Tun ṭum hi kumin chhunga South America-a C-130 Hercules a chetsual vawi hnihna a ni a, February 27 khan Bolivia sipai thlawhtheihna chu La Paz bulah a ṭum tur a chesual a, mi 24 an thi a ni.