Brazil President hlui Bolsonaro a inah hreng dawn

Brazil president hlui, Jair Bolsonaro chu sorkar paihthlak tuma puhna thubuaia thiam loh chantirin kum 27 tang tura hrem a ni a, mahse, a hriselna ṭhat tawk loh avangin jail aṭanga chhuah tirin a inah hren chhunzawm a ni dawn.

Kum 71 mi, Bolsonaro hi nikum November thla khan thiam loh chantir a ni a, in lamah hren a nih hnuin January thla khan tan-inah dah a ni. Mahse, March 13 khan pneumonia avangin tan-in aṭangin damdawi-inah dah luh a ni. A hriselna ṭhat tawk loh vangin Supreme Court justice Alexandre de Moraes chuan Thawhlehni khan tan-inah awm tawh loa a chenna ina a haw a phalsak. Mahse, ni 90 hnuah a chungchang hi ngaihtuah ṭhat leh a ni dawn tih a sawi nghal bawk.

Bolsonar hi an ram khawpui, Brasilia-a a chenna ina hren a ni dawn a, mahse ankle monitor a vuah bakah cellphone a hman pawh phalsak a ni dawn lo tih judge chuan a sawi. Police-ten a in hi an veng reng dawn a, a in bulah amah thlawptute punkhawm phal a ni lo ang. Hei bakah Bolonsaro hi a chhungte leh a doctor chauhin an tlawh phalsak a ni dawn bawk a ni.