Pakistan president hlui Pervez Musharraf Thi turin a chungthu rel sak

General Pervez Musharraf, Pakistan president hlui leh sipai hotu hlui chu Islamabad-a special court chuan thi turin a chungthu a rel.

Pervez Musharraf  chung­thu reltu court-ah hian member pathum an awm a, 2013 aṭanga tihkhawtlai tawh, ram phat­santua Musharraf puhna chung­changah hian nimin khan thutlukna hi an siam ta a ni. Musharraf  hi 1999 khan an ram sipai hotu lu ber a ni ṭhin a, sipai chakna hmanga sor­kar paihthlain kum 2001 aṭanga 2008 inkar khan Pakis­tan president a ni bawk.

Kum 2008-a President aṭanga a ban khan ramdangah a tlanchhe nghal a, mahse kum li hnuah an ramah hian kir lehin, ram phatsantu leh thuneihna a chan laia Pakistan Constitution Article 6 palzuta puhin thubuai siamsak a ni. Mahse kum 2016 khan a hriselna ṭhat tawk loh avangin ramdanga inenkawl tura a kal phalsak a ni a, Dubai panin Pakistan-ah hian a kir duh tawh lo a ni. 

Kum 2007, President a nih laiin Musharraf hian an ramah emergency puangin, a thiltih sawiseltu judge eng emaw zat a mantir bawk. Emergency a puan hi a term pawhseina tura a tih nia puh a ni a, hei hian an ram Constitution a kalh nia puh a ni. Mahse Musharraf hian an puhna hi a pha thung a, tun thlan tira damdawi-in khum aṭanga video hmanga thuchhuah a siamah pawh an puhna hi ṭanchhan nei lo tih a sawi leh a ni. 

Emergency a puan vang hian an ram chhungah nasa takin duh lohna lantir a ni a, 2008 khan impeachment a paltlang duh loh vangin a bang a ni. Gen Musharraf hi ṭum eng emaw zat thah tum a ni tawh a, ram hruaitu a nih lai khan thah tumtu hi an tam zual. 

Tunah hian kum 76 mi ni tawhin March 2016 aṭang khan Dubai-ah hian a la khawsa reng a ni. Dubai leh London-ah a hun tam ber hmang zuiin kumin March thla khan Dubai-a damdawi-inah dahluh a ni.