Theihtawp kan chhuah tlan a ngai : Hong Kong chief secretary

Hong Kong chief secretary, Matthew Cheung chuan, "Hong Kong buaina a ziaawm theih nan theihtawp kan chhuah tlan a ngai a ni," tiin press conference a neihnaah a sawi. 

Hun engemaw chen Asian financial hub, Hong Kong-a buaina chuan ziaawm lam a pan hnuah, Pathianni khan sorkar laka lungawi loa nawrh huaihawtte chuan buaina liantham zawk an thlen leh a, he thil thleng hian a tih lungngaih thu  Cheung chuan a sawi bawk. 

Pathiannia buaina thlengah hian police-te chuan nawrh huaihawtte hi hnawhdarh nan mittui tlakna hlo an hmang leh a, hei hi kar hnih dawn hnua nawrh huaihawt leh police-te an innawr buai lehna hmasa ber a ni. 

Hong Kong leader Carrie Lam chuan China President Xi Jinping chu Thawhṭanni khan Beijing-ah hmuin, Xi Jinping chuan Hong Kong buaina chinfelna tura a hmalaknaah huai­sen a tih thu Lam a hrilh. Lam hi dan pangngai angin mainland China-ah hian a zin a, a zin chhung hian Xi Jinping nen hian an inhmu a ni. Xi Jinping bakah hian China Premier Li Keqiang pawh a hmu bawk. 

Hong Kong buaina 

Hong Kong-a nawrh huaihawt bul ṭanna chu sorkarin 'extradition bill' siam a tum vang a ni. He bill hi danin thiam loh a chantir tawh mainland China-a thawn phalsakna a ni. He duh lohna hi thla 5 chuang lantir a nih hnuah,  Hong Kong legislature chuan official-in a hnawl. 

Hetihlai hian China chuan, 'one country, two systems' chu a zawm zel tih sawiin, Hong Kong buaina chu China buaina a ni, tiin a sawi. Hemi hnu hian nawrh hi titawp loin, mipuite chuan sorkar laka an lungawi lohna hrang hrangte an lantir chhunzawm zel a ni.