Kum 2019-ah journalist 49 thah an ni

Reporters Without Bor­ders-in nimina report a tihchhuahah, kumin chhungin khawvel hmun hrang hrangah journalist 49 thah an nih thu a sawi. Hei hi kum 16 chhunga a tlem ber ṭum tih a sawi bawk. 

Kumina journalist thah zinga a tam zawk hi Yemen, Syria leh Afghanistan buai­na an cover laia thi an ni tih sawiin, Paris-based watchdog chuan journalism chu hna hlauhawm tak a la ni reng a ni, a ti. Kum 20 kalta chhung khan kumtin journalist 80 vel thah a ni ṭhin tih a tarlang. Organisation hotu Christoophe Deloire chuan buaina thlenna hmunte chu journalist-te tana hmun hlauhawm tak tura ngaih a nih laiin ram muanawm zawk nia ngaihah pawh journalist-te hian kut an tuar fo tih a sawi. Kumina mi kut tuar thi journalist 10-te chu Mexico rama thi an ni tih a sawi bawk. 

Kuminah mi kut tuara journalist thi zat hi tlahniam mah se, man erawh nikum aiin 12% in a pung thung a, journalist man tawk hi 389 zet an awm a ni. Heng zinga a zahve dawn hi China, Egypt leh Saudi Arabia rama man an ni.