Boeing-in 737 Max series titawp dawn

Boeing company siam  thlawhtheihna, 737 Max series chuan thla nga chhungin hmun hnihah a chesual a, ram hrang hrangte rin loh a hlawh phah hnuah, Boeing company chuan nakkum January thla aṭangin Boeing 737 Max chu an titawp hlen dawn.

Kar liam ta khan Federal Aviation Adminis­tration (FAA) chuan nakkuma Boeing thlawhtheihna 737 Max series hi service tir chhunzawm an phal tawh loh thu a sawi. Hemi chungchang hi Boeing board chuan nihnih chhung Chicago-ah ngaihtuahin, a tawpah nak­kum January aṭanga tihtawp hlen an rel fel ta a ni. 

Kumin March thla aṭang khan Boeing thlawhtheihna thar ber 737 Max series hi a him tawk lo nia ngaiin, ram hrang hrangte'n an airlines te hnenah hmang chhunzawm rih lo turin an tih hnuah, Boeing chuan an thlawhtheihna thar hi khawvel pumah an chawlh lailawk tir rih a ni.

Nikum October thla khan Indonesia Airlines thlawhtheihna, Boeing 737 Max hi Java Sea-ah a chesual a, hemi hnu kumin March thla khan Ethiopian Airlines thlawhtheihna, Boeing 737 Max 8 chu Addis Ababa hmunah a chesual ve leh bawk a ni. He chetsualnaah hian mi 346 in nunna an chan a, Boeing company chuan zangnadawmna US dollar 114,500 ṭheuh a pek tur thu a puang zui. 

Boeing 737 Max series pahnih chetsual chhanah hian thlawhtheihna control system a chian tawk loh vang leh, a ṭhat tawk loh vang a nih thu investigator-te chuan an sawi. Boeing chuan MAX series hi thlawhtheihna a siam zinga a hralh chak ber nia sawiin, customer 100 vel hnen aṭangin order 5,000 chuang a hmu niin a sawi. Boeing company chuan 737 Max series a tihtawp dawn avangin, sum lam pawh a hloh nual dawn a ni.