Khawvel pumah oil man a pung leh

US-Israel leh Iran indona chuan a kar ngana a thleng a, buainain ziaawm lam a la pan theih loh vangin Thawhṭanni khan khawvel pumah oil man a pung leh. Brent crude oil man chu 3% a pungin, barrel khat USD 115 a kai a ni. Indona thlen hma khan Brent crude oil man hi barrel khat USD 72 a ni.

West Asia buaina hian zual lam a la pan zel a; Iran thlawp, Yemen helpawl Houthi in Iran puia Inrinnia Israel bei ve lehin, Iran-in US leh Israel official-te awmna university leh in te beihah a vau leh bawk.

Pathiannia Financial Times-in a kawmnaah, US president Donald Trump chuan Iran oil hmunpui, Kharg Island chu an laksak maithei niin a sawi a, hemi hmun venhimna kawngah Iran chuan venhimna ṭha a nei lo a, awlsam taka an lak mai theih a rin thu a sawi a ni.

Shipping expert leh Maersk director hlui,Lars Jensen chuan West Asia buaina hian a nghawng rei tawh avangin Strait of Hormuz chu hawng thut pawh ni se, oil man hi a la san belh a rin thu a sawi. Hei bakah buaina hian ei tur lam chi man pawh a nghawng theih tur thu a sawi bawk. Khawvela seaborne fertilizer 20 - 30% chu Gulf aṭanga hmuh a ni a, buaina hi a reh thuai loh chuan ei tur man a sang thuai thei dawn a, hei hian ram retheite a nghawng na zual dawn niin a sawi. Energy market expert hrang hrang pawhin Strait of Hormuz kaltlanga supply a khaihlak chhunzawm zel chuan Brent oil man hi barrel khat USD 130 te a la kai theih mai an rin thu an tarlang.