Coronavirus avanga thi pun belh zel
China health authority chuan an rama hri leng mek, novel coronavirus (2019-nCoV) vanga thi chu an pun belh zel tih sawiin, Thawhṭanni thleng khan he hri vanga thi hi mi 80 an tling tawh. He hri kai, finfiah tawh hi mi 2,744 an tling tawh bawk a, an zinga mi 42-te dinhmun chu a ṭha lo hle.
National Health Commission-in report a tihchhuah tharah, darkar 24 chhungin hri kai thar hi 769 an awm thu leh, rinhlelh mi 3,806 an awm bawk tih a sawi. Hetihlai hian he hri kai, enkawl dam tawh mi 51 an awm bawk. NHC chuan he hri kaite hian an kai tirhte, an taksaah pawh a natna a lanchhuah hma pawhin midang an kaichhawng thei nghal nia sawiin, hri leng hi a chak telh telh niin a sawi.
Coronavirus hi China bakah ramdangah pawh a darh zel a, Thawhṭanni thlenga China pawn lama he hri kai hriatchian tawh chu - Thailand-ah mi pasarih, Japan (3), Republic of Korea (3), United States (3), Vietnam (2), Singapore (4), Malaysia (3), Nepal (1), France (3) leh Australia (4) an awm tawh a ni.
China premier Li Keqiang chuan nimin khan he hri hmuhchhuah ṭanna, Wuhan khua a tlawh a, hri leng mek khuahkhirh leh veng tura hma lak dan hrang hrangte a enpui. Li Keqiang hian Communist Party of China (CPI) high-powered committee a ho a ni.
Hri leng hi ram dangah a darh belh zel avangin World Health Organization chief Tedros Adhanom Ghebreyesus pawh Beijing-ah a zin a, China sorkar official-te hmuin hri leng mek chungchang hi a sawipui dawn.
Novel coronavirus veite hian khawsik, khuh leh thawk lama harsatna an tawk a ni. He hri danna, vaccine hi tunah chuan a la awm rih lo. Thuneitute chuan mipuite chu pawn an chhuahin hmaikawr, mask vuah turin an ngen a, an kut chu tui leh sahbawn hmanga fai taka sil ṭhin tur te, kut fai loin mit,hnar leh ka te khawih lo tur leh, an khuh leh hahchhiau pawhin inhup tur leh an puan/tissue hmante pawh bawlhhlawh bawma paih a, hmanrua fai lo an khawih pawhin an kutte uluk taka sil fai ṭhin turin an ti.