WHO expert team-in Wuhan an thleng ta

WHO leh China sorkar hi expert team tirh chungchangah hian hun rei tak an inbia a, China-in kal a remtih hnuah team member-te chu an rama luh a lo phalsak lo leh a, mahse a hnuah inremna an siam leh thei ta a ni. Expert team-ah hian ram hrang hranga scientist 15 an awm. Mahse team member zinga pahnihte chu Singapore-a an test-naah coronavirus positive an ni tih hriat a nih avangin an kal ve rih lo a, midang zawngin Wuhan hi an pan a ni. Wuhan khawpuiah hian research institute, hospital leh Covid-19 hmuhchhuah ṭanna nia sawi, seafood market-a mite an kawm kual dawn ang. Covid-19 hri hi kum 2019 kumtawp lam khan Wuhan-ah hian hmuh ṭan a ni. China chuan Wuhan chu Covid-19 hri hmuh hmasakna ni mah se, a lo chhuah ṭanna erawh a ni kher lo thei tih a lo sawi fo tawh thung. 

Team member-te hi research an ṭan hmain kar hnih chhung khung hran an ni phawt ang. Mahse khung hran an nih chhung pawhin video conference hmangin Chinese expert-te nen hna an thawk ho dawn tho a ni.  China pana an chhuah hmain team leader, Peter Ben Embarek chuan thil awm dan chhui chhuah nan hun pawh a duh rei a rin thu a sawi. 

WHO team-in China an thlen ni, nimin khan China rama Hubei province-ah Covid-19 vanga thi pakhat a awm belh leh a, hei hi thla riat chhunga hripui thihpui an awm lehna hmasa ber nia report a ni. Hripui len ṭanna ram ni mah se, China hian khuahkhirhna khauh taka kalpuiin hri leng hi a thunun hman tawh a, nunphung pawh a pangngai chho ṭan a, mahse tun hnaiah hri kai hi an pung thar leh a ni. Hei vang hian an ram hmarlam bial, mi maktaduai 20 chuang chennaah chuan lockdown a puang mek. 

Nimin khan hri kai hmuh chhuah thar 138 an awm leh  niin National Health Missoin chuan a tarlang a, hei pawh hi nikum March thla hnua nikhatah hri kai hmuh chhuah an tam ber ṭum a ni. . China-ah hian hripui vanga thi record hi nimin thleng khan mi 4,635 an awm. Hri kai enkawl dam hi mi 82,324 awm tawhin enkawl mek 885 an la awm a ni.