UK-ah Covid-19 vanga thi tam ber ni thleng leh

Unitd Kingdom (UK)-ah Nilaini khan Covid-19 vanga thi mi 1,564 an awm belh leh a, nikum March thla hnua  ni khata hripui vanga thi an tam ber ni a thleng leh. 

UK-ah hian hri leng hian zual lam a la pan zel a, Europe ram zingah hripui leng tuar nasa ber a ni tawh a, he hri vanga thi hi mi 85,000 dawn awm tawhin, hri kai hmuh chhuah hi maktaduai 3.2 an tling tawh a ni. 

World Health Organisation (WHO) chuan nikum Decem­ber thlaa UK-a Covid-19 hri chi dang, VOC 202012/01 hmuh chhuah chu ram dang 50-ah a darh tawh niin a sawi a, South Africa-a hri chi dang, 501Y.V2 hmuh pawh ram 20-ah a darh tawh bawk tih a sawi. 

Hri darh zel tur venna atan UK-ah hian kar liam ta aṭang khan khuahkhirhna khauh taka kalpui a ni a, prime minister Boris Johnson chuan inkhuahkhirhna siam chuan awmzia a nei chho ṭan hle niin a sawi. Hemi rual hian a ṭul a nih chuan tuna an hman mek aia khuahkhirhna khauh zawk pawh siam a la ni thei tih a sawi nghal bawk. 

Johnson chuan sorkar chuan a vaccination prog­ramme chu vaccine duh ang zat an neih hunah 24-hour kalpui tum a ni tih a sawi a, tunah erawh vaccine supply hi an la indaih tawk lo tih a sawi a ni. Britain hi vaccine pe chhuak hmasa ber ram niin, mi maktaduai 2.4 vel hnenah vaccine hi pek a ni tawh a, sorkar chuan February thla laihawlah chuan mi maktaduai 15-te pek hman a tum.