A ṭum hnihna atan Trump-a'n impeachment a hmachhawn nawn

US President ṭanglai, Donald Trump chu kar liam taa amah  thlawptuten US Capitol Building luhkhung a, buaina an chhuah kaihhnawihah impeach a ni leh a, US President zinga impeachment ṭum hnih hmachhawntu hmasa ber a ni.

Democrats lam chakna, House of Representatives-ah Nilaini khan impeachment chungchangah hian debate neiin vote lak a ni. President Trump chuan nikum November thlaa President thlanna neihah thil dik tawk lo a awm nia a sawi fo chuan amah thlawptute chu lungawi lohna lantir a, tharum thawhna hial thlen turin a cho chhuak a ni, an ti.  House speaker, Democrats Nancy Pelosi chuan Capitol Building-a helna chhuak chu President-in a chawh chhuah a ni tiin, an ram tana mi hlauhawm a nih avangin paihthlak  ngei a ṭul tih a sawi. Republican member tam zawk pawhin Trump hi an ṭan lo a, mahse chawpchilh taka impeachment kalpui chuk chuk chu thil ṭha ber a ni lo tih an sawi thung. 

House-in impeachment hi a thlawp avangin Trump hian upper chamber Senate-ah an puhna chungchang hi a hmachhawn leh a ngai dawn a, Senator hmun thuma ṭhena hmun hnihin an thlawp a ngai dawn thung a,  Republican senator 17 talin impeachment thlawp lamah Democrats memmber-te an vote pui a ngai dawn a ni. Hetih lai hian Republican senator eng emaw zat chuan a thlawp lamah vote an hreh dawn lo nia sawi a ni. 

President Trump-a term hi kar leh Nilaini hian a tawp tawh dawn a, a term tawp hma chuan Senate chuan a chungthu hi a ngaihtuah hman a rinawm loh. Mahse a term tawp hnuah a trial hi ngaihtuah chhunzawm theih a ni tho a ni. Senate-in thiam loh a chantir ve leh a nih chuan roreltute hian Trump hian elected office luah thei tawh lo turin an block thei dawn a, hei hi a thleng a nih chuan kum 2024 inthlana Trump-a'n chuh a tum leh maithei nia a sawi chu a tipuitling thei dawn lo a ni. 

House-a impeachment vote a tlang hnuah Nilaini khan Trump chuan video a tichhuak a, impeachment chungchang erawh a sawilang lo a, mahse amah thlawptute chu boruak ṭha tak siam tura chahin, tharum thawhna leh thil suasamte chu an ramin a duh lo tih sawiin, amah ṭantu diktakte chuan politics vanga tharum thawhna hi an thlen ngai lo ang tih a sawi. 

Sorkar office-a mi tupawh dan kalh emaw thil dik lo taka kalpui an awma an laka thubuai siamsak hi "impeachment" chu a ni. US-ah chuan President chauh ni lo, federal official hrang hrang pawhin an hmachhawn thei. Impeachment an hmachhawn avang hian thil an tisual ta tihna pawh a ni kher lo

US Constitution (Article II, Section 4) hmangin federal official nihna sang tak chelhte chu "ram phatsan, thamna la emaw thilsual lian tak emaw" tih vanga thiam loh chantir an nih chuan office aṭangin paihthlak theih an ni. "Thilsual lian" tih chin hi debate theih a ni a, House leh Senate-ah thilsual lian a nih dan chin hi siamfel a ni.

A ni kher lo a, federal official (President ang te) impeach awmzia chu House of Representatives-a a tam zawk (51%)-in thil tisuala an puhna chu an pawmpui tihna  a ni. Official thiam loh chantirna hi Senate-ah vote lak a la ngai a, a tam zawkin an pawmpui a nih chuan office aṭanga paihthlak a ni chauh ang

A thleng khat. United States history-ah official pariat- an vaiin federal judge-te chiah impeachment hnuah office aṭanga paihchhuah an la awm. Trump hma hian President impeachment hmachhawn pahnih chiah an la awm a, mahse an pahnih hian Senate chuan thiam chantir ve vein office aṭanga paihchhuah an ni lo

Impeachment ṭum hnihna hmachhawn chhan 

President Trump thlawptute hian January 6 khan Congress session neih laiin US Capitol Building an luhkhung a, security force-te  nen innawr buaiin buaina a chhuak a, mi panga an thih phah a, mi 52 man an ni bawk.  

Capitol Building luhkhung a nih avang hian Congress member-te chu an tlanchhia a, ṭhenkhat chu police-te venna hnuaiah an office lamah hruai an ni bawk. Hetianga tharum thawhna chhuah chhan hi Trump-a'n inthlanna an neih chu a dik lo a, amah thlawptute chu ram hmangaihna lantira an aw chhuah tur leh, theihtawpa bei let tur a chah vang nia puh a ni.