Portugal-in ram pum inkharkhip a puang

Portugal prime minister António Costa chuan Nilaini khan tunhnaiah an ramchhungah Covid-19 hri kai an pun leh avangin ram pum inkharkhip a puang leh a, vawiin aṭang hian inkharkhip hi an ṭan leh ang.

António Costa chuan inkharkhip dan chu nikum March leh April lama an lo kalpui tawh angin mahni ina awm a nih thu sawiin, 'state of emergency' tharah chuan nitin mamawh lam tura kal leh ralkhat aṭanga tih theih loh tak tak thil tihte chauh phal a ni dawn, a ti.

Costa chuan an ram sorkarin company leh an hnathawk, state of emergency puan avanga khar ngaite chu sum leh pai hmanga a ṭanpui dawn thu sawiin, ni 15 chhung daih zel anga chhawmdawlna an pek dawn thu a sawi.

Restaurant-te chu home delivery emaw take-away emaw an phalsak dawh thu sawiin, fair, chaw zawrhna hmun leh supermarket-te chu hunbi neia hawn hun an siam dawn thu a sawi bawk a ni.

Portugal hian hripui len hnuah vawi eng emaw zat state of emergency a lo puang tawh a, tuna a puan thar leh hi a ṭum kuana a ni tawh. Nilaini khan hri kai thar mi 10,556 lai an awm leh a, hei hi ni khata hri kai thar an tam ber ṭum niin an ramah hian mi 5,07,108-in hri an kai tawh. 

Mi 156 an thih leh bawk avangin Portugal-ah hian Covid-19 vanga thi 8,326 an awm tawh.