Southern California-ah ram a kang

US-a California state chhim lamah kar liam ta khan ram kang nasa tak a thleng leh. Ram kang, Springs Fire an tih hi Los Angeles khawchhak lam km 103 vela hla, Riverside County-ah ram sq km 16 velah a thleng a ni.

Fire official-te chuan nimin khan ram kang tam zawk hi an thunun thei tawh tih an sawi a, ram kanna chhehvela chengte insawn chhuak tura thupek an tihchhuah tawh pawh an sut leh tawh a ni. Ram kang hi 75% vel an thunun tawh a, kangmei chhuak thar a awm tawh rih lo niin Riverside County Fire Department chuan a tarlang.

Kangmei chhuah chhan tak hi hriatchian a la ni lo a, thli chak tak Santa Ana tleh vangin a darh chak hle a ni. Mahse, Zirtawpni aṭang khan thli tleh hi a ziaawm a, kang ṭhelh hna pawh chak zawkin an kalpui thei a ni. Kangmei chhuak hian structure pawimawh tihchhiat a nei lo. A chhuah ṭanna hi mi nuai 2 vel chenna, Moreno Valley bula recreational area-ah a ni.