Iran-in Gulf rama energy infrastructure-te a bei leh

Iran chuan nimin khan United Arab Emirates, Bahrain leh Kuwait-a energy infrastructure te a bei leh a, civilian facility eng emaw zat a kap chhia.

US leh Israel-in Iran an beih hnuah, Iran hian US military base awmna Gulf ram hrang hrangte chu a bei tel ve nghal a, Iran beihna atana US sipaite an ram leilung hman phalsakah a puh. Kar liam ta chhung khan drone leh missile hmangin ṭum eng emaw zat a bei hlawm a ni. Mahse, Gulf ramte hian Iran-in a puhna hi an pha thung.

Abu Dhabi thuneitute chuan nimin khan UAE hmarthlang lam, Ruwais Industrial City-a Borouge petrochemical plant chu a kang tih an sawi. Iran drone leh missile kah chhuah, an air defence system hmanga an lo kahthlak them tlain kangmei hi a tichhuak niin an sawi. Hliam tuar an awm lo a, thil a tihchhiat dante enfiah mek a nih thu UAE defence ministry chuan a sawi.

Iran hian a hmain UAE-a aluminium industry leh Kuwait-a US military infrastructure an bitum tur thu an lo sawi tawh a ni. Gulf rama civilian infrastructure te chu beihah a lo vau fo tawh bawk.

Nimin vek khan Bahrain-a energy company storage tank chu Iran drone in kap fuhin a kang bawk a, mahse, rei lote hnuah kangmei hi an ṭhelhmit leh nghal a ni. Hemi hma hian Kuwait power and water desalination plant pahnih chu Iran drone-in a lo kap fuh tawh bawk a ni.