US-Israel airstrike-ah IRGC intelligence chief a thi

Iran chuan US leh Israel-in nimin zinga an rama airstrike an neihah Islamic Revolutionary Guard Corps (IRGC) intelligence chief, major general Majid Khademi a thi tih a sawi.

IRGC chuan thuchhuah siamin, Israel leh US chuan Khademi chu thah tuma an bitum a ni tih an tarlang a, Khademi chu 'martar' ah an puang a ni.

Israel defence minister Israel Katz leh Israel Defence Forces (IDF) pawhin nimin vek han IRGC intelligence chief, Majid Khademi chu Israel Air Force ten an that tih an puang ve bawk. IDF chuan nimin zing khan Tehran-ah hmun eng emaw zatah beipui an thlak tih an puang bawk.

Kum 2025 June thlaa ni 12 awh Iran-Israel indona thlengah khan Israel-in a beihnaa IRGC-a Intelligence Protection Organization chief, Mohammad Kazemi chu a thi a, hemi kum June 15 khan Khademi hi a thlaktu atan ruat nghal a ni. Kumin February 28-a US leh Israel-in Iran an beihnaah IRGC leh Iranian Intelligence Ministry-a hotu eng emaw zat chu thah an ni tawh. Khademi hi IRGC senior official la dam pathum zingah a tel nia sawi a ni a, mahse, nimin zing khan thah a ni ve leh ta a ni.

Khademi hian kumin January thlaa Iran sorkar laka lungawi lohna lantirtu, nawrh huaihawtte leh Iran security force-te innawr buaina nasa tak thlengah khan, nawrh huaihawtte fuihpawrh leh boruak tichhetuah puhin US president Donald Trump chu nasa takin a lo sawisel tawh a ni. Khademi chuan an ram chhung hmun hrang hrangah mipui nawrh huaihawtnaah khan foreign intelligence service 10 chuang an inrawlh tih sawiin, an zingah hian Israel cyber warfare leh intelligence unit pawh an tel tih a sawi.