Iran-in power plant bulah human chain siam turin ṭhalaite ngen

US president Donald Trump-a'n Strait of Hormuz hawng tura Iran hun a pek a tawp dawn hnaih tawh avangin, US-in an ram power plant pawimawhte venhimna atan ṭhalaite chu power plant pawimawh hrang hrangah human-chain siam turin a ngen.

President Trump chuan a hun tiam chhunga Iran-in Hormuz Strait a hawng lo a nih chuan Iran power plant pawimawh beihah a vau a ni. Trump chuan Iran hun a pek chu a pawhseisak tawh a, hei vang hian hun pek belh a ni tawh dawn lo tih sawiin, a ngenna an zawm lo a nih chuan zan khat lekah an ram pum chu an tichhe thei tiin a vau a ni. A hun pek hi Iran huna tukin zing dar 3:30 khan a tawp a ni.

Iran deputy of youth affairs, Alireza Rahimi chuan nimin chawhnu dar 2 vel aṭang power plant hrang hrangah ṭhalaiten human chain siam tura an ngen thu leh, an ram infrastructure leh building pawimawhte venghim turin ṭhalaite an che chhuak dawn tih a sawi. He ruahmanna hi university zirlai, artist leh ṭhalaite pawl hrang hrangten an rawt zawk a nih thu tarlangin, 'Human Chain of Iran's Youth for a Bright Future" tia an vuah thu a sawi bawk.

US leh Iran inkara palai han thawktu ramten ni 45 chhung inkahhai puan rawtna an siam chu Iran hian a hnawl a, inkahhai puang loa indona chu tihtawp hlen a duh tih a sawi thung. Pakistan, Turkey leh Egypt aiawh chuan text message hmangin Trump-a special envoy, Steve Witkoff leh Iran foreign minister Abbas Araghchi te inkarah palai hna an thawk a, mahse, inremna erawh an la siam thei lo a ni.