Vietnam Parliament-in President atan To Lam thlang

Vietnam parliament, National Assembly chuan nimin khan an ram president atan Communist ​Party secretary general To Lam chu lungrual takin an thlang. President hna hi kum nga chhung a chelh ang.

Parliament website-a tarlan danin, nimina session-ah hian member panga an tel lo a, a tel member 495 te chuan an vaiin To Lam hi president atan an thlang vek a ni. Parliament hian prime minsiter atan Le Minh Hung an thlang nghal bawk.

President atana thlan a nih hnua TV-a thu a sawiah, kum 68 mi To Lam chuan an ram hruaitu lu ber ni tura thlan a ni chu lawmawm a tih thu sawiin; science, technology, innovation leh digital tranformation lama hma sawnna tur chu an ngaihtuah leh ngaih pawimawh hmasak tur a nih thu a sawi. Ram dinhmun ngelnghet siam a, hmasawnna nghet leh mitinte dinhmun chawikan chu a dah pawimawh berte an ni tih a sawi bawk.

To Lam hi kumin January thla khan Vietnam politics-a rank sang ber, Communist Party of Vietnam general secretary atan thlan a lo ni tawh a ni. Communist Party hi Vietnam rama legal party awmchhun a ni. President atana thlan a nih zui leh bawk avangin an rama dinhmun sang pahnih a chelh kawp dawn a, a kuta thuneihna sang tak a awm dawn avangin rorelna kawngah a inlulin viau leh, Vietnam political system lamah nghawng a neih hlauthawnna a awm tel thung a ni.

Prime minister atana thlan, Le Minh Hung Hung hi kum 55 mi niin kum 2016-2020 chung khan central bank governor a ni. Vietnam PM ni thei naupang ber a ni a, party lamah langsar leh thawm nei lian tak a ni ngai lem lo.