Israel leh Hezbollah te inbei chhunzawm

US leh Iran-in Strait of Hormuz hawng tura kar hnih awh tur inkahhai an puan mek laiin, Israel leh Lebanon helpawl, Iran thlawp Hezbollah te erawh an inbei chhunzawm reng thung.

Israel prime minister Benjamin Netanyahu chuan US-Iran inremna siam chu a thlawp thu a sawi rualin, an inremna hian Lebanon a huam tel lo tih a lo sawi tawh a, Hezbollah nuaibo tura an beih chhunzawm zel tur thu a sawi a ni. Nilaini khan Israel chuan Lebanon-a Hezbollah hmunhmate nasa takin a bei leh nghal a, Hezbollah lam pawhin rocket hmangin israel hmar lam an bei ve bawk. Israel sipaite chuan Beirut-a beihpui an thlaknaah Hezbollah hotu, Naim Qassem-a personal secrtary, Ali Yusuf Hashi a thi niin an sawi.

Nilaini khan Lebanon khawpui, Beirut bakah Bekaa Valley leh chhim lama Hezbollah command centre leh military site-te chu Israel chuan an bei a, an beihpui thlakna avang hian mi 254 thiin mi 1,000 chuangin hliam an tuar niin Lebanon civil defence service chuan a tarlang. Health ministry lam chuan thi zat hi 182 niin a tarlang thung a, nimin kha ram pumah mitthite sunna ni atan a puang zui bawk.

Hezbollah chuan nimin zing khan rocket hmangin Israel hmar lama Manara an kap tih an sawi ve bawk. Israel leh America-in an ram an beihna an tihtawp hma chuan an chhang let zel dawn tih an thuchhuahah an tarlang. March 2-a Hezbollah-ten Iran thlawpna lantira Israel an beih hnuah, Nilaini leh nimin khan Israel leh Hezbollah inbeihna thlen leh nasat ber nia sawi a ni.