Nepal PM hlui Deuba manna thupek tichhuak

Nepal court chuan an ram prime minister hlui, kum 79 mi Sher Bahadur Deuba chu eirua puhna kaihhnawihah nimin khan manna tur thupek a tichhuak.

Prime minister thar Balendra Shah kaihhruai sorkar a din hnuah, nikuma Gen Z nawrh huaihawtte beih let a nih chungchangah prime minister hlui, KP Sharma Oli leh home minister hlui Ramesh Lekhak te pawh man an lo ni tawh bawk a; mahse, a hnuah thu delhkilh neiin chhuah leh an ni.

PM hlui Deuba hi ram dangah in enkawlin a awm mek a, eirua puh a nihna chu thu dik lo a nih thu a sawi. An awmna hmun hi a sawi lang lo a, mahse, Nepal media chuan Singapore-ah an awm niin an tarlang a, police-te chuan Interpol notice an dil mek a ni. Department of Money Laundering Investigation-in a ngenna angin, court chuan Deuba nupui, foreign minister hlui Arzu Rana Deuba manna thupek pawh a tichhuak tel bawk.

Deuba hi Nepali Congerss party hruaitu niin, prime minister dinhmun hi term nga a chelh a ni. "Engmah zep leh thup ka nei ngai lo. Ka hun pum chu Nepal rama inrelbawlna ṭha, democratic system dinna turin ka hmang a ni," a ti.

Nikuma Gen Z nawrh huaihawtten building an hal zingah Deuba chenna pawh hi a tel a, nawrh huaihawt zinga ṭhenkhaten an nupaa an bei zui lai pawh online lamah a darh nasa hle. Deuba inah hian pawisa fai eng emaw zat hmuh chhuah a ni tih sawi a ni bawk a, hemi chungchang hi chhui chiang tura tih a ni.