Pakistan-ah US leh Iran aiawhte inbe dawn

US leh Iran chuan kar hnih chhung inkahhai an puan hnuah, inremna nghet zawk a awm theih dan ngaihtuahin Pakistan khawpui, Islamabad-ah vawiin hian inbiakna an nei dawn.

US president Donald Trump chuan Pakistan hmalaknaa inbiakna neih turah hian US aiawhte ho turin vice president JD Vance a ruat. US palai zingah hian Doanld Trump-a special Middle East envoy Steve Witkoff leh a makpa, Jared Kushner te pawh an tel. Iran aiawhte chu parliament speaker Mohammed Bagher Ghalibaf leh foreign minister Abbas Araghchi te'n an ho dawn nia sawi a ni bawk. Islamic Revolutionary Guard Corps (IRGC) member an tel ve dawn leh dawn loh sawichian a ni lo.

Islamabad Talks 2026 neih tur atan hian Pakistan chu a inbuatsaih uluk hle a, khawpui chhungah chhuak vak tihtlemna turin holiday an puang a, venhim hna thawk turin security force mi leh sa 10,000 chuang an duty bawk. Sorkar building leh foreign embassy-te awmna huam chhungah venhimna khauh taka kalpui a ni a, inbiaknaa tel tur palaite thlenna tura ruahman, Serena Hotel-a khualzin thlengte pawh hmun dangah insawn tura hriattir an ni. Mahse inbiakna neihna hmun tur tak erawh puanzar a ni lo.

Pakistan foreign minister Ishaq Dar chuan social media-a Islamabad Talks 2026 neih tur puala kal, ram aiawhte bakah journalist-te chu an lo lawm vek tih sawiin, hemi atan bik hian visa chungchanga khuahkhirhna siam chu thlahdul a ni tih a sawi bawk. Airlines hrang hrangte chu US-Iran inbiakna neih tur avanga Islamabad-a kal turte chu visa tel loa an kal phalsak tura hriattirin, Pakistan an thlen hunah immigration hotuten visa hi an lo siamsak nghal dawn tih a sawi.

Report ṭhenkhatin a tarlan danin, inbiakna neih turah hian US leh Iran aiawhte hmaichhanah an inhmu dawn lo a, room hranah awmin Pakistan official-te chuan vilin, an thu leh hla an hrilh tawn zel dawn a ni. A ṭul dan azirin inbiakna hi Pathianni thleng pawha neih chhunzawm tura ruahman a ni.