Russia leh Ukraine-in Othodox Easter pualin inkahhai puang

Russia leh Ukraine chuan Orthodox Easter pualin darkar 32 chhung, Russia huna Inrinni tlai dar 4 aṭanga Pathianni zan zanlai thleng inkahhai an puang. Nikum khan Easter pualin darkar 30 chhung inkahhai an lo puang tawh bawk a, mahse, an inremna siam bawhchhiaah an inpuh tawn a ni.

Ukraine president Volodymyr Zelenskyy chuan Easter puala inkahhai puan hi a rawt fo a, a ngenna hi Russia lamin an ngaihven mai loh hnuah, nimin khan inkahhai puan an remtih thu Russia president Vladimir Putin chuan a puang ve ta a ni.

Russia defence minister Andrei Belousov chuan Chief of the General Staff Valery Gerasimov chu inkahhai puan chhungin sipai chet lakna zawng zawng chawl vek turin a hriattir a, hemi rual hian hemi hun chhunga beih an nih chuan na taka an chhan let nghal tur thu a sawi zui bawk.

Zelenskyy chuan an inremna siam chu Ukraine chuan a zawm ṭha dawn tih a sawive bawk a, mitinte chuan Easter chu boruak muanawm tak leh rilru hahdam taka an hman a ngai a ni, a ti.