China-in Taiwan nena inzawmna tihtawp tawh kalpui leh dawn

Taiwan eptu pawl, Kuomingtang Party (KMT) hruaituin China ram a tlawh hnuah, China sorkar chuan Taiwan ram nena an inzawmna ṭhenkhat a lo tihtawp tawh chu a kalpui chhunzawm leh dawn tih a puang. Heng zingah hian direct flight thlawh tir leh, Taiwan aquaculture product hrang hrang lak luhte a tel.

KMT hruiatu Cheng Li-Wun leh China president Xi Jinping te chuan kar liam ta kartawp khan meeting an nei a, ram pahnihte inkara boruak muanawm a awm theih dan turte an sawi dun. Taiwan hi mahnia inrelbawl hran ram ni mah se, China hian a ram chinah a chhal a ni. Kum 2016-a Taiwan president atana Democratic Progressive Party hruaitu Tsai Ing-wen thlan a nih aṭang khan China leh Taiwan inkar a ṭha lo chho a, China chuan Taiwan sorkar a thawhpuina tam tak titawpin, an ram thlithlaia vil turin nitin sipai thlawhtheihna leh lawngte a tir ṭhin. Kum 2019 khan China mite chu Taiwan-ah mimal thila an zin a khap a, Taiwan pawhin China aṭanga lut turte chu khawthlang ramte ang bawka resident visa nei turin a phut tel ve bawk.

Kum 2021 khan China chuan Taiwan lakhuihthei lak luh a khap a, hemi hnu hian Taiwan thei thar chhuah dang bakah sangha lam thlenga lak luh a khap belh leh tawh bawk. Mahse,Taiwan Ministry of Agriculture chuan China thuneitute biain, an thlai leh thei thar chhuah an thawn luh theih dan tur hi an sawipui a, loneitute leh sumdawngten ram pawn lama an sumdawnna huang an zauh theihna turin theihtawp a chhuahpui zel tur thu a sawi.