Israel-in intelligence agency hotu thar tur pawm

Israel chuan intelligence agency, Mossad hotu thar atana rawt Roman Gofman chu Pathianni khan a pawm. Gofman hian Mossad director ni lai, David Barnea a thlak dawn a, July 2 aṭangin a hna thar hi a chelh ṭan ang a, kum nga term tur a ni.

Prime minister Benjamin Netanyahu chuan nikum December thla khan Mossad hotu atana Gofman rawt a tum thu hi a lo sawi tawh a ni. Pathianni khan Supreme Court president hlui, Asher Grunis kaihhruai Senior Appointments Advisory Committee chuan a rawtna hi a pawmsak a ni.

Kum 49 mi, Gofman hi military general niin, kum 2023, October 7-a Hamas firfiakten Israel chhim lam an beih ṭum khan an mi leh sate venghim a, firfiakte beih letnaah khan a tel a, hliam pawh a tuar a ni. PM Netanyahu nena inpawh ṭha tak nia sawi a ni a, kum hnih dawn chu a military secretary a lo ni tawh bawk. Hemi hma hian Isearel sipaiten Hamas ho hneh a, Gaza Strip an thunun theih dan tur document sawi zui hlawh tak a lo ziak tawh bawk.