US leh Iran-in inbiakna an neih leh beisei

US leh Iran aiawhten Pakistan khawpui, Islamabad-a kar liamta kartawpa inremna nghet zawk siam dan kawng zawnga inbiakna an neih chu hlawhchham mah se, ram pahnihte hian inbiakna nei leh turin an la inhawng nia sawi a ni. Hei vang hian inremna siam a nih theihnan inbiakna an neih leh beisei a ni.

Report ṭhenkhatin a tarlan danin, ram pahnih aiawhte Islamabad-ah inbiakna neih leh turin an kal leh dawn nia sawi a ni a, a hun chiah sawi lang lo mah se tunkar tawp lamah an kal rin a ni. Pakistan chuan US leh Iran thuneitute chu inbiakna neih hun tur chungchangah a be kual mek niin an tarlang.

Pakistan official chuan Iran lam an biak hnuah inbiakna chhunzawm turin an inhawng a, chhanna ṭha tak an dawng tih a sawi. Iran lam chuan official-a thuchhuah engmah an la nei lo thung. US pawhin thuchhuah a la nei lo bawk. Mahse, Pakistan prime minister Shehbaz Sharif chuan theihtawp an chhuah mek tih a sawi a ni.