Uganda sipai hotuin Turkey hnenah USD tld 1 leh a nupui tur pe turin phut

Uganda sipai hotu, chief of defence force, Muhoozi Kainerugaba chuan Turkey ram hnenah USD tld 1 pe tur leh, an rama nula hmelṭha ber chu a nupui atana pe turin a ti. He thu hi Pathianni khan X-ah a post a, a thil phut hi ni 30 chhunga an tihlawhtling lo a nih chuan Turkey nen an inzawmna titawpin, Kampala-a an emmbassy pawh khar a nih tur thu a sawi. Muhoozi Kainerugaba hi Uganda president ni lai, Yoweri Museveni fapa a ni bawk.

Kainerugaba chuan Turkey chu Somalia-a business leh infrastructure project bakah, an khawpui Mogadishu-a port leh airport aṭanga hlawkna tam tak telah a puh. Heng project aṭanga Turkey-in hlawkna a tel laiin, Uganda chuan kum tam tak venhimna lam hna thawhna atan a inseng thung a ni, a ti. Uganda hian kum 20 dawn chu Somalia ramah hian African Union mission hnuaiah firfiak pawl Al-Shahaab bei turin sipai ṭhahnem tak a tir tawh a ni. Venhimna hna an thawhna avang hian Turkey chuan USD tld 1 a pe tur a ni tiin, Uganda laka Turkey chet dan chu a dik tawk lo tih a sawi. An ram mipuite chu an himna atan Turkey rama zin lo turin a chah nghal bawk a ni.