NKorea hotu Kim-a'n missile test enpui

North Korea hotu, Kim Jong-un chuan an indo lawng thar aṭanga missile test an neih chu a enpui tih nimin khan state media chuan a tarlang.

NKorea official newspaper, Rodong Sinmun chuan Pathianni khan kum 2015, April thlaa an khuh hawn, ton 5,000-a rit indo lawng, Choe Hyon aṭangin anti-ship missile pathum leh cruise missile pahnih kah chhuah a nih thu a sawi. An target an fuh hmain cruise missile hi darkar hnih chuang boruakah an thlawk a, anti-ship missile hi minute 30 chuang an thlawk bawk. Korean Central News Agency chuan Kim leh senior official dangten missile kah chhuah an enpui lai thlalakte a tichhuak a ni.

Kim hian thla hmasa khan Choe Hyon aṭanga missile test vawi hnih neih a lo enpui tawh bawk. Pathiannia hlawhtling taka enchhinna an neih leh hnuah, an ram nuclear force chu an thuam chak zel dawn tih a sawi a, destroyer pathumna leh palina siamna tur ruahmanna te pawh a enpui nghal bawk.

Choe Hyon hnuah nikum May thla vek khan NKorea chuan an destroyer pahnihna, Kang Kon chu a khuh hawng bawk. Mahse, hawn ni la la hian Chingjin port-a a awmna hmun aṭangin chesualin a chhe ṭhen a, siamṭhat a nih hnuah June thlaah an khuh hawng leh a ni. Siamṭhat hnu hian a hman tlak tak tak em tih erawh chu expert lam aṭangin zawhna a tam hle.

State media chuan detroyer pathumna chu an ram khawthlang lam tuipui kam, Nampo lawng siamna hmunah siam mek a nih thu sawiin, kumin October thlaa rorelai Workers' Party din champha lawm rualin khuh hawn hman tum a nih thu a tarlang.