SKorea-in American YouTuber jail tang turin hrem

American YouTuber, Johnny Somali chu South Korea court chuan an ram chhunga mawi lo taka a chet avangin thla ruk chhung jail tang turin nimin khan a hrem.

Johnny Somali hian nikuma Seoul khawpui a tlawh ṭumin Indopui II-na hun laia tihluihna hmanga nawhchizawrh tirte hriatrengna puala milim an siam chu fawpin, milim malchungahte a lam a, a video clip hi a post zui bawk. He thil thleng vang South Korea thuneitute chuan thubuai siamsakin, an ram a chhuahsan an khap nghal a ni. Nimin khan court chuan Khalid chu thubuai siamsak hrang hrangah thiam loh a chantir a, a YouTube kaltlanga sum hmuhna turin mipui hmuha mawi lo leh, South Korea dan zah lohna lantirna content-te a thehdarh a ni, a ti. Prosecutor-te chuan kum thum tan tir an hut a, mahse, judge-te chuan thla ruk tang turin a tihsak ta zawk a ni. Jail aṭanga a chhuah hnuah kum tling lo leh rualbanlo te thawktu pawl a thawhpui khap a ni bawk.

Kum 25 mi, a hming tak Ismael Ramsey Khalid hi content mawi lo leh huatthlalaawm tak tak a siam fo avangin streaming platform lam pawhin an lo hrem fo tawh a ni. Japan leh Israel-a a zin ṭumin mipuite tibuai zawnga a chet avangin sawisel pawh a hlawh hle. Tel Aviv-a hmeichhe police officer laka ṭawngkam mawi lo tak a hman avangin rei vak lo hren a ni a, Japan-ah pawh a chet dan mawi lo avangin yen 200,000 chawi tir a ni tawh bawk a ni.