Mi 250 chuanna lawng a pil

Andaman Sea-ah mi 250 chuanna lawng a pil tih United Nations refugee agency chuan a sawi. Lawnga chuangte hi Rohingya refugee leh Bangladesh mite an ni a, naupang pawh eng emaw zat an tel.

UN. High Commissioner for Refugees (UNHCR) leh International Organisation for Migration (IOM) chuan thuchhuah inṭawm siamin, lawng hi Bangladesh chhim lam, Teknaf aṭanga chhuakin, Malaysia pan tur a nih tih an sawi. Thli na tak a tleh avang leh, tui a khauh leh a fawn nasat avangin lawng hi thunun thei loin a chesual ta a ni tih an tarlang. Lawnga chuangte chin hi hriat a ni lo a, a chetsual hun chiah pawh hriat a ni lo.

Myanmar aṭanga Bangladesh rama raltlan, Rohingya Muslim te hi an dinhmun chhia leh khawsak harsat avangin ram dangah an tlanchhe leh fo a ni. Malaysia ram hi Muslim tamna ram a nih avangin Rohingya raltlan tam tak chuan lawngin an pan tawh. Mahse lawngin a phurh zawh tawk tura bithliah aia tamte an chuang fo a, hei vang hian chetsualna pawh a lo thleng fo tawh a ni. Malaysia ram thlen dawn hnaiah tualchhung thuneitute chuan an lawng ṭhenkhat chu a kir tir leh fo bawk.