Iran thil neih hrek sak USD tld 100 chuang hu a tling

West Asia buaina thleng mek tihtawp a nih theihna atana inbiakna neih hmasakah, Iran-in a thil phut zinga pakhat chu ram danga a thil neih, khawih chet theih loh hreksak mekte tihtawp a tel. Ram hrang hranga Iran thil neih hrek sak mek hi USD tld 100 chuang hu a tling nia sawi a ni.

Islamic revolution a chhuah hnuah, US leh ram dangte chuan kum 1979 aṭang khan Iran hrekna hi an lo siam tawh a ni. A hnu leh zelah pawh nuclear programme kalpuia puhin US leh a thawhpui ramte chuan hrekna hi an siam belh leh fo bawk. Iran hian ram danga a thil neihte bakah, oil a hralhna sum, foreign bank-a awmte pawh a khawih che thei lo a ni. Ram dangin a thil neih an hreksak mek hi Iran-in kum khata hydrocarbon a hralhna aṭanga a sum hmuh let thum vel an tling nia sawi a ni bawk. Iran thil neih hreksak hi tihtawp vek mah se Iran hian a zahve vel bak a chang thei dawn lo nia sawi a ni. Tam tak hi investment atana a lo tiam tawh leh, loan rulhna atan a pek a ngai dawn a ni.

Kum 2015 khan Iran chuan khawvela thiltihthei zual ramte chu hetih hunlaia US president, Barack Obama palaina hnuaiah inremna, Joint Comprehensive Plan of Action (JCPOA) a siampui a ni. He inremna hnuaiah hian Iran chuan a nuclear programme kalpui chu tihtawp a remti a, ram dangten a thil neih an hrekte an titawp ve bawk. Mahse, kum 2018-a Donald Trump president term khatnaah khan he inremna aṭang hian US chu a inhnuhdawh pui a, Iran thil neihte an hreksak zui leh nghal bawk.