Trump-a'n Pelosi hnenah lehkha a thawn Impeachment na takin a sawisel
US president Donald Trump chuan Thawhlehni khan House of Representatives Speaker Nancy Pelosi hnenah phek ruka thui lehkha thawnin, House Democrats impeachment chu na takin a sawisel.
A laka impeachment siam chu dan kalh, lamṭang siam tumna, phiarruk tumna a ni tih ziakin, thil tih awmang lo lutuk leh ram danpui kalha thuneihna dik lo taka hmanna a nih thu a ziak. "Nang leh Congress-a Democrats nasa tak lamṭang siam tumtute hian impeachment hi titawp ula, America mipuite tan hna thawh chhunzawm rawh u," tiin a ziak. Ukraine chungchanga an puhna chu thu dik lo a nih thu ziak lang bawkin Democrats zawk chu America inthlana dik lo taka inrawlh zawkah a puh let.
Pelosi hnena a lehkha thawnah hian,"America inthlana inrawlh zawk chu nangmahni a ni. America democracy tichhetu chu nangmahni zawk hi in ni. Dikna tidaltu chu nangmahni hi in ni zawk," tiin a ziak. A la duhtawk mai lo a, Democrats chu politics-a hamṭhatna zawngah a puh zui bawk.
Pelosi hnena a lehkha thawn tlangzarh a nih hnu lawkah hian Trump chuan White House-ah impeachment hmachhawn turin engmah tihsual a neih loh thu a sawi. Democrat kaihhruai House of Representatives-ah hian nimin khan Trump impeachment article pahnihah vote lak tur a ni a, vote-ah hian a tlang a nih chuan Trump hi US history-a impeachment formal taka hmachhawn leh Senate-a fiahna hmachhawn tur pathumna a ni ang. Mahse Senate hi Republican lam thuneihna a nih zawk avangin Trump hi hum a nih tho rin a ni thung.
Senate-ah chiah hian thiam loh chantir theih a ni a, fiahna hmachhawnah hian member hmun thuma ṭhena hmun hnihin impeachment hi an pawm chauhin President chu thiam loh chantir theih a ni. Tunah hian Senate-ah hian Republican 53 awmin, Democrats 45 an awm mek a ni.