Myanmar sipaiten Rohingya muslim 173 an man

Myanmar chhim lam tuipuia lawnga chuang, Rohingya muslim 173-te chu Myanmar sipaiten an man thu an tarlang. 

Heng Rohingya muslim 173 an mante hi sakhuanna avanga tihduhdahna tuar an nih avanga tlanchhiat tum an ni a, an man zingah hian naupang 22 an tel a ni. Myanmar navy-te chuan an lawng chuanna hi rinhlelin an dap a, hetah hian Rohingya muslim-te hi an manchhuah tak thu  Myanmar sipai thupuangtu Tun Tun Nyi chuan a sawi. 

Kum 2017 August thla khan Myanmar sipaiten an ram  khawthlang lam, Rakhine state-a Rohingya helte laka beihpui an thlak avangin, Rohingya Muslim mi nuai sarih chuang chu hmun him lam panin an tlanchhia a, a tam zawk chu Bangladesh ramah an tlanchhia a ni.

Myanmar sipaiten Rakhine state-a Rohingya helte laka beihpui an thlakna chhan hi, kum 2016 October thlaa Rakhine state-a police post beih a nih vang a ni. Myanmar sipaite chuan Ro­hingya muslim-te a nawlpuia bitum nia an puhna chu phain, police post beitu helho chauh beiah an insawi thung. Mahse khawvel ram hrang hrangin Myanmar sipaite chet dan hi an dem a, an ram aṭanga Rohingya Muslim-te thenfai tuma cheah hial an puh a ni. 

United Nations chuan Rohingya-te hian Myanmar sipaite lak aṭangin pawngsual, nghaisak leh thahte an tawk niin a report a, mahse UN report hi Myanmar sorkar chuan a pha thung.

Kum 2017 aṭang khan Bangladesh-ah hian Rohingya raltlan mi 730,000 chuang an awm thu leh, Rakhine state-ah hian Rohingya muslim 600,000 vel an la awm thu UN investigator-te chuan an tarlang.