Krismas hmain Brexit law pharh a ni ang : British Deputy Finance minister

British House of Commons inthlanna neih zawh taka hnehna changtu, Conservative Party hruaitu prime minister Boris Johnson sawi lawk angin, "Krismas hmain Brexit law chu parliament-ah pharh a ni ang," tiin deputy finance minister Rishi Sunak chuan thuthar thehdarhtute hmaah a sawi.

"Ruahman lawk anga December 25 hmaa Parliament-a Brexit "Withdrawal Agreement Bill" put­luh leh ngei a nih theih chuan, nakkum January thla tawpah chuan European Union aṭangin Britain chu kan chhuak thei tawh dawn a ni," tiin Sunak chuan a sawi bawk.

Britain Parliament-a House of Commons chuan October thla khan a thuphungin Withdrawal Agreement Bill hi a lo pawm tawh a, mahse December-a inthlan an neih tak avangin Parliament-ah pharh ṭhat leh a ngai a ni.

Sunak chuan Brexit law ngaihtuah fel a nih hnuah budget thar pawh pharh tum a nih thu leh, sorkarin a ngaihpawimawh berte zinga mi, 'Britain National Health Service" funding tihsan a nih tur chungchangte pawh a sawi tel bawk. 

Britain Parliament chuan Euro­pean Union (EU) aṭanga Britain inlak­chhuahna tur, Brexit law chung­chang hi vawi tam a lo ngaih­tuah tawh a ni. Boris Johnson leh a kaihhruai Conservative Party chuan nakkum January chhunga EU 

aṭanga an chhuah theih nan theih­tawp an chhuah dawn a ni.