Japan-ah ram danpui ennawn tum duh lohna lantir

Japan prime minister Sanae Takaichi-i kaihhruai sorkarin an ram danpui ennawn a tumna chu duh loin, Pathianni khan Tokyo-a parliament, National Diet building bulah mi tam takin nawrh an huaihawt.

April 8 aṭang khan danpui ennawn tumna hi duh loin parliament building bulah hian nawrh an lo huaihawt tawh a ni. Pathiannia pungkhawm hi mi 36,000 vel an tling tih nawrh huaihawttute chuan an sawi. Pungkhawmte hian PM Takaichi chu indo an duh lohna thu leh, Japan danpui leh a bikin Article 9 chu humhim an duhna thuziakte an keng a ni.

PM Takaichi kaihhruai, rorellai Liberal Democratic Party's (LDP) chuan parliament lower house-ah majority a nei a, eptu lamin an dodal chungin danpui siamṭhatna hi kaltlangpui a tum niin an sawi. Danpui siamṭhat an tum dan chu indona chawk chhuak thei ram zingah siam an tum a ni, an ti.

Japan ram danpui hi kum 1947 aṭanga an hman a ni a, pacifist constitution tia sawi ṭhin a ni. Danpuia Article 9 chuan indona leh ram dang nena buaina sipai chakna hmanga chinfel tumna a hnawl a ni. Indona thlen thilte neih a khapsak bawk. Mahse, Takaichi leh right-wing force chuan Article 9 hi ennawna siamṭhat an tum a, April 12-a convention an neihah PM chuan ram danpui siamṭhat a hun tawh tih a puang a ni.