Kum 10 chuang hnuah Iraq-Syria border crossing hawng

Iraq leh Syria inkalpawhna pawimawh tak pakhat, Rabia border crossing chu Thawhṭanni aṭang khan hawn a ni leh a, kum 10 chuang hnuaa an hawn lehna hmasa ber a ni.

Official-te chuan ramri hi insumdawn tawnna leh oil thawn chhuahna tura atana pawimawh niin an sawi. Syria chuan lei lam aṭanga oil thawn chhuahna atana him niin a ngai a ni. He crossing hi Iraq-in Rabia tiin a sawi a, Syria lamin Yarubiyah an ti thung. Kum 2011-a Syria tualchhung indona a thlen khan khar a ni a, kum 2014 khan Islamic State firfiak pawlin helai bial hi an la a, mahse, Iraq Kurdish force-ten a hnu reiloteah an la let leh a ni.

Syria sorkar hnuaia SANA news agency chuan, Syria leh Iraq official-te chuan border crossing-ah ram pahnihten thawh dunna ṭha zawk an neih theih dan tur te, inkalpawh leh sumdawnna pawh awlsam zawka kalpui a nih theih dante an sawi ho tih a tarlang. Helai ramri kaltlang hian oil pawh phurh chhuah thuai theih an beisei.

Iran hi oil a hralhnaah a innghat lian hle a, an budget-a 90% dawn chu oil hralhna aṭanga an sum hmuh a tling pha a ni. Mahse, oil a thawn chhuah tam zawk hi Strait of Hormuz kaltlang an nih avangin, West Asia-a buaina thleng mek leh, Iran-in Hormuz Strait a khar chuan a nghawng na hle a ni. Hei vang hian tuipui lam chauh ni loin, lei lam aṭanga oil thawn chhuah theih dan kawng pawh a ngaihtuah a ngai ta a ni.