Denmark-a rel insuah mi 17 an hliam

Denmark-ah nimin khan khualzin phur rel pahnih an insu a, mi 17 in hliam tuarin an zinga pali chu an dinhmun a ṭha lo hle niin official-te chuan an sawi.

Chetsualna thlenna hmun hi Denmark khawpui, Copenhagen hmarlama Hillerod leh Kagerup khaw inkarah a ni a, local train ve ve an ni a, an ram huna nimin zing dar 6:30 vela thleng a ni. Rel pahniha chuangte hi an vaiin lak chhuah nghal an ni tih police-te chuan sawiin, hliam tuarte chu ambulance leh helicopter hmangin phurh chhuah nghal an ni.

Rel insut chhan tak hi hriatcihana la ni lo a, thuneitute chuan chhui chian nghal a nih thu an sawi. Report ṭhenkhat chuan rel pakhat zawk driver hian station a chhuahsan dawnin stop-signal awm chunga tlanin, a tlanna tur ni lo lamah a tlan niin an sawi.

Denmark-ah hian rel chetsualna hi a thleng khat hle a, nimina rel insu pawh hian an rama rel chetsualna liantham zingah a tel. Gribskov municipality mayor Trine Egetved chuan hetiang chetsualna hi a thlen nawn tawh lohna atana hma a lak a ngaih thu a sawi.