Myanmar leh Thailand hotute inkawm

Myanmar president thar Min Aung Hlaing leh an ram tlawhtu, Thailand foreign minister Sihasak Phuangketkeow-te chu Nilaini khan Naypyitaw-ah an inkawm. An thu ngaihtuahte an puangzar lo a, hemi rual hian Myanmar hruaitu hlui hren mek, Aung San Suu Kyi dinhmun erawh an sawi lang tih Thailand hruaitu chuan a sawi.

Sihasak Phuangketkeow chuan Myanmar President hian Suu Kyi-i chu ṭha taka enkawl a nih thu leh, sorkarin thil ṭha tak a ngaihtuah mek thu a hrilh tih a tarlang. Hei hi thil lawmawm tak nia a ngaih thu Sihasak chuan a sawi a, ASEAN ram hrang hrange chuan Suu Kyi leh a hriselna dinhmun te an ngaihtuah hle tih a sawi. Kum 80 mi, Suu Kyi hi kum 2021-a Min Aung Hlaing kaihhruaia sipaiten civil sorkar an paihthlak hnua man niin, tun thlengin an la hreng a ni. Thubuai hrang hrang siamsakin thiam loh chantir a ni a, kum 27 tang tura hrem a ni. Thubuai siamsak zingah hian eirua puhna, buaina siam tura mipui fuih, inthlana dik lo taka thilti leh state secrets law bawhchhiaa puhnate pawh a tel.

Kar liam taa Min Aung Hlaing kaihhruai sorkarin tang eng emaw zat a ngaihdamna a siamah Suu Kyi pawh telin, a tan hun chu hmun ruka ṭhena hmun khat turin a tihtlem sak. Civil sorkar paihthlak taka president, jail-a tang mek Win Myint pawh ngaihdam niin chhuah a ni bawk.