Nepal Home Minister Gurung a bang

Nepal sorkar thara home minister Sudhan Gurung chuan minister atana lak luh a nih aṭanga thla khat pawh a tlin hmain a investment tihchungchangah zawhna tam tak a awm avangin banna a theh lut leh nghal.

Gurung chuan Nilaini khan social media-ah minister a nihna aṭanga a ban thu hi a puang a ni. "Home Minister post aṭangin ka bang a, hei hi kan chungchang an sawina ṭha taka chhui a, an hna thawhnaah office ka luah avanga harsatna a awm lohna atana ti ka ni," a ti. Investment a tih chungchanga mipui lam aṭanga sawi leh zawhna awmte chu a ngai thutak hle tih a tarlang. Mipuiin ram hruaitu an rin tawkna chu a pawimawh ber tiin, a chungchang pawh langtlang leh dik taka chhui a nih theihna a hna aṭangin a bang a ni.

Kum 36 mi, Gurung hi Gen Z ni loin millenial ni mah se, nikum September thlaa Nepal sorkar laka lungawi lohna lantira Gen Z nawrh huaihawtah khan a buaipuitu zingah a tel a ni. Sorkar paihthla a, inthlan an neih hnuah March 27 khan prime minister Balendra Shah kaihhruai sorkar thara Home Minister atan lak luh a ni.

Home Minister atana lak a nih tuk, March 28 khan Gurung hian prime minister hlui K.P Sharma Oli leh home minister hlui Ramesh Lekhak te manna tur thupek a tichhuak nghal a, hemi ni hian man an ni nghal bawk. PM hlui Oli leh Lekhak te hi Gen Z te nawrh huaihawt ṭuma mi eng emaw zat thihna thleng kaihnawihah man an ni.