EU-in Ukraine hnena USD tld 105 loan pekna tur pawm

European Union chuan Ningani khan Ukraine hnena loan, USD 105 (euro tld 90) pekna tur a pawm a, hemi rual hian Russia ram hrekna thar siam an remti bawk.

EU-in loan a pek tur hian kum hnih chhunga Ukraine mamawh hmun thuma ṭhena hmun hnih a phuhru thei tura ngaih a ni. Economist-te chuan hun rei tak Russia nena indo tawh, Ukraine ram hi EU-in loan a pek chhuah thuai loh chuan kumin June thlaah sum an nei tawh dawn lo niin an tarlang. European Commission hotu, Ursula von der Leyen chuan, Russia-in Ukraine a beihna a tihnat zual leh Ukraine ram an puihna an tipung ve zel dawn tih a sawi. Ukraine chu amah inveng thei tur leh, Russia war economy thlenga nawr thei tura anpuih tur thu a sawi a ni.

Cyrus-a informal summit neihah, EU ambassador-te chuan Ukraine loan pekna, EU member Hungary in a veto avanga hun rei tak tihkhawtlai tawh hi an pawm a ni. Hungary hian Nilaini khan veto-na hi a sut a, Ninganiah pawm an ni ta a ni. Ukraine president Volodymyr Zelenskyy chuan EU loan pek tur chuan an ram sipaite a thuam chak phah dawn a, Ukraine mipui tana mamawh hrang hrangte pawh an tih theih phah dawn tih a sawi.

EU loan pek tur, USD tld 105 zingah a zahve chauh hi kumin pek a ni rih ang a, a zahve dang chu nakkumah pek an ni ang. Loan pek tur zingah a tam ber chu sipai thuam chakna tura ruahman a ni a, health leh education lam tan euro tld 17 vel ruahman a ni bawk.