Hacker-ten Sri Lanka finance ministry sum USD mtd 2.5 ruksak

Sri Lanka finance ministry computer system chu hacker-ten khawih chingpenin, ministry sum USD mtd 2.5 an ruksak. He thiltitute hi chhui zui mek an ni.

Official chuan he thil thlen hun hi kumin January thla vel kha niin an sawi a, thu kimchang erawh an puanzar lo. Hacker-ten sum an ruk hi Australia ram pawisa an batsak an pek tur zinga mi niin an sawi bawk.

Finance ministry secretary, Harshana Suriyapperuma chuan an pawisa ba hi an pek hnuah, cyber criminal te chu inrawlhin sum hi a dawngtu tur ni loin, account dangah an lo thawn niin a sawi. He thil thleng vang hian Public Debt Management Office-a senior officer pali chu suspend an ni tawh a, an chhui zuinaah ram pawn lama enforcement agency-te puihna pawh an dil mek tih a sawi. Australia lamin an sum hi an dawng lo tih an hrilh hnuah Sri Lanka official-te hian pawisa bo an hre ve chauh a ni.

Hacker-te hian sum an ruksak dan tak hi sawichian ni lo mah se, investigator-te chuan sorkar-in a sum ba a pek dan tur, payment instruction thawnna email chu an khawih chingpen niin an sawi. Deputy finance minister Anil Jayantha Fernando chuan India hnena an ba an pekna tur pawh hacker-te hian lo khawih an tum bawk a, mahse an hlawhtling lo tih a sawi.