US President Trump paih tumnain House a paltlang Senate-ah fiahna a hmachhawn leh dawn

US president Donald Trump chu US history-a an president impeachment hmachhawn pathumna a ni ta a, Nilaini khan House of Representatives chuan impeach-in Senate-ah a chungchang ngaihtuah a ngai dawn ta.

Donald Trump hi thil pahnih- thu­neihna dik lo taka hmangah leh Congress daltuah puh a ni bawk.  

House of Representatives-a impeach­ment vote lakah hian Democrats zawng zawng deuh thawin a pawm lamah an vote a, Republican zawng zawngin a pawm lo lamah an vote. Senate hi Republican majority neihna a nih avangin a tlang a rinawm loh thung. A chungchang thua vote lak a nih lai hian Donald Trump hian Battle Creek, Michigan-a campaign rally-ah thu a sawi a ni.

Darkar 10 chuang zet debate neih a nih hnuah, president Trump impeachment charge chungchangah hian an ram huna Nilaini zan dar 8:30 velah vote lak a ni a, an puhna pahnihah hian a hrang ve vea vote lak a ni.

An puhna pakhat zawk- thuneihna hmang dik loa puh a nihnaah hian impeachment thlawp lamah vote 230 tla in, a thlawp lo lamah vote 197 a tla thung. Democrats pahnih- New Jersey aiawh Jeff Van Drew leh Minnesota aiawh Collin Peterson-te'n a thlawp lo lamah an vote.

Congress daltuah puhnaah hian a thlawp lamah vote 229 tlain, a thlawp lo lamah vote 198 a tla thung. Democrats lamah an puhna hmasaa a thlawp lama vote-tu Maine mi Jared Golden chuan thlawp lo lamah a vote a ni. Republican zingah a thlawp lama vote an awm lo. Senate-ah chuan kum tharah vote lak a ni chauh thung ang.