Australia: Ram kang vangin New South Wales-ah emergency puang

Australia thuneitute chuan ramkang vangin nimin aṭang khan Aus­tralia chhimchhak lama awm, New South Wales (NSW)-ah ni 7 chhung atan emergency an puang.

Ram kan chhan hi khawlum lutuk vang a ni a, thli lum (heatwave) in thing kung a tih kan aṭanga inṭan niin thunei­tu­te chuan an sawi. Thing­kung 100 chuang a kan avangin NSW-ah hian emergency puan zui a ni.

Thla hlui khan ram kan nasat vangin Australia-a NSW leh Queensland-ahte emergency puan a lo ni tawh bawk. Heta kangmei chhuah chhan hi tlangval kum 20 miin thil a hal aṭanga inṭan niin police-te chuan an sawi. Ramkanna hmun NSW hi Australia-a mihring chen tamna ber a ni a, mihring nuai 75.4 vel an cheng mek nia sawi a ni. Australia Bureau of Meteorology chuan an ram pumpui khaikhawma khawlum ber ṭum chu Thawhlehni (Dec 17) kha a nih thu an tarlang a, hemi ni hian 40.9 degree celcius a ni. 

Australia ramah hian nipui a inṭan mek a, Decem­ber aṭanga Februa­ry thla hi an nipui a ni. Hei vang hian Australia ram hian khawlum lam a pan ve zel bawk. Khua a ro vang te, thil lum vangte leh tui tlem vangin ramkang hian ziaawm lam a pan hlei thei lo niin thuneitu lam chuan an sawi.