EU-in Maynmar hrekna pawtsei

European Union chuan Myanmar ram a hrekna hrang hrang chu kum khat a pawhsei belh leh a, nakkum April 30 thleng a awh ang.

Thawhṭannia thuchhuah an siamah, European Council chuan Myanmar ram chhung dinhmun a la ṭhat loh vang leh, democracy ngaih pawimawh lohna a la awm reng vang te, human rights bawhchhiatna tam tak a la awm avangin he thutlukna hi an siam tih a tarlang.

EU hian kum 2021, February 1-a sipai chakna hmanga Myanmar civil sorkar paihthlak a nih leh, sipai sorkar a din hnuah mimal 105 leh pawl/company 22 lakah hrekna hi a siam a ni. Hrekna a siamte hi EU rama an thil neihte khawih chet theih loha hrek sak a nia, EU ram aṭanga fund leh puihna dang pek khap a nih bakah, EU ramah an zin khap a ni.

Mi mal leh pawl hrekna a siam bakah, EU hian Myanmar Armed Forces (Tatmadaw) te thawhpuia training pek a khap a, sipai leh border guard police-te hman tur ralthuam leh a hmanraw dangte thawn luh a khap tel bawk a ni. Hei bakah Myanmar sorkar hnena sum lama puihna a pek ṭhin pawh titawpin, chhawmdawlna dang pek turte pawh a titawp bawk.