Indonesia-ah daycare centre-a thawk mi 13 man

Indonesia rama nau enkawlna, daycare centre-a naupang an awmte enkawl an nih dan tha lo avangin police-te chuan mi 13 manin thubuai an siamsak.

He thil thlenna hmun hi Java island-a Yogyakarta-a daycare centre, Little Aresha a ni. Centre-a naupangte enkawl an nih dan thlalak darh chungchangah a thawktu hlui chuan police hnenah complaint a theh lut a, police-te chuan kar liam ta Zirtawpni khan dapin, mi 13 an man nghal a ni. An mi mante hi naupang enkawltu mi 11 te bakah, he centre-a headmaster bakah centre dintu foundation hotu te a ni.

Social media lama thlalak darhah naupangte hi chhuatah diaper chauh hrengin muttir an ni a, an kut leh ke puanin phuarsak an ni bawk. Police-te chuan centre an dap hnuah, heng thlalak hi a lo dik ngei tih an sawi. Centre-ah hian room pakkhat, metre thum biala zauah naupang 20 dah khawm an ni tih a sawi, naupangte hi kum hnih leh a hnuai lam an ni tih an sawi bawk.

Mi 13 an mante hi an naupang enkawlte ngaihthah leh an hnaa inthlahdahah puhin thubuai siamsak an ni a, thubuai dang pawh siam belh leh an la ni maithei. Police-te chuan centre-ah hian naupang 100 vel an enkawl a, a tam zawk hi ṭha lo taka enkawl an ni tih an sawi. Indonesia rama naupang humhalhna dan hnuaiah, thubuai siamsakte hi thiam loh chantir an nih chuan kum nga thleng lung-in tantir bakah, rupiah mtd 100 thleng chawi tir theih an ni.