UAE-in OPEC leh OPEC+ chhuahsan dawn

United Arab Emirates chuan oil siam chhuaktu ram intelkhawm, Organisation of the Petroleum Exporting Countries (OPEC) leh OPEC+ chu May 1 aṭangin a chhuahsan dawn tih Thawhlehni khan a puang. US-Israel leh Iran indona avanga Gulf ramten Strait of Hormuz kaltlanga oil thawn chhuah lamah harsatna an tawh mek karah he thutlukna hi a siam a ni.

UAE energy minister Suhail Mohamed al-Mazrouei chuan Middle East-a power energy kalphungte uluk taka an thlir hnu leh, oil siam chhuah kawnga an hmalam hun turte an ngaihtuah hnuah he thutlukna hi an siam tih a sawi.

West Asia buaina chhuah hnua Iran-in Strait of Homuz a khar avangin OPEC member, Gulf ramte chuan an oil siam chhuahte thawn chhuah kawngah harsatna an tawk nasa a, hei vang hian khawvel huap pawhin oil man a san phah hle a ni. Thawhlehni khan Brent crude oil man chu barrel khat USD 111 a tling leh tawh a, hei hi indona thlen hmaa a man zat aiin 50% dawnin a sang tawh a ni.

US leh Israel-in an ram an beih hnuah, Iran hian US military base awmna, an ṭhenawm Gulf ram dangte pawh a bei let tel a, hei vang hian Gulf ramte sawisel pawh a hlawh phah hle a ni.

OPEC aṭanga a chhuah dawn tak avangin UAE hian oil a siam chhuah kawngah bithliah siamsak a ni dawn ta lo a, a duh angin consumer demand a zirin a siam thei dawn a, hei hi an oil leitu ram dangte tan chanchin lawmawm tak a ni dawn a ni. Hemi rual hian Iran-in Hormuz Strait a la khar chhunzawm reng avangin OPEC aṭanga UAE chhuah hian oil market lamah erawh nghawng a neih zui nghal erawh a rinawm loh a ni.

UAE hian kum 1967-ah Abu Dhabi kaltlangin OPEC hia zawm a, February 28-a US-Israel leh Iran indona a chhuah hma khan ni khatah crude oil hi barrel mtd 3.4 vel a siam chhuak ṭhin. An chhut sak danin oil hi ni khatah barrel mtd 5 vel siam thei dawn a ni. OPEC ramte oil siam chhuah hi khawvel puma oil siam chhuah aṭanga 44% a tling pha.