SKorea appeal court-in President hlui kum 7 tang turin hrem

South Korea appeal court chuan an ram president hlui, Yoon Suk-yeol chu kum 2025-ah manna tur thupek tihchhuah a nih hnuah, amah man tumte lo dan tira puh a nih chungchangah kum sarih tang turin nimin khan a hrem.

Yoon hi a president lai, kum 2024 December 3-a an rama sipai thuneihna sang pekna tur, martial law a puan avangin president a nihna aṭanga paihthlak a nih bakah, thubuai hrang hrang siamsak a ni bawk. Nimina appeal court-in thiam loh a chantirna hi kum 2025, January thlaa Corruption Investigation Office-a official-ten man an tum ṭuma presidential security official-te a dantir chungchang a ni. Yoon hi a thuneihna hmang sual leh, martial law hlih a nih hnuah a puan chhan sawifiahna tura document lem siama puhna thubuaite pawh siamsak a ni bawk.

Kumin January thla khan district court chuan kum nga tang turin a hrem a, hei hi special counsel leh Yoon chuan an appeal ve ve a ni. Special counsel chuan kum 10 tantir a phut a ni.